（下）
点击下方收听音频，时长6分16秒。
伊个海外亲眷希望伊好过去，伊面提供个物质条件邪气诱人。讲走就走，伊邪气干脆、利落个办好了所有个出国手续，伊陪牢伊，觉着办好一桩，身体就空脱了一部分，直到身体全部拨淘空。伊信誓旦旦：只要勒国外立稳脚跟，马上就接伊出国。
伊相信，也勿相信。人勿可能淌过同一条河浜，同样个闲话，讲了无数遍就是说谎，更何况，让个大男人去乘小女人个荫凉，也勿是伊个做派。倚靠勒伊宽厚个肩胛浪，伊离别伤痛个眼泪水流下来了。伊个心也勒勒滴血，但是，面孔浪却是勒微微笑，温柔个低声个关照伊。
伊还真勿是等闲之辈，到国外去之后，国际电话忒贵，就写信，侪是好事体。呒没两年，伊就发来喜讯了：可以申请出国了。伊个爷娘却随便哪能勿同意：侬到国外去做啥，靠伊养活啊？再催再逼，伊就是勿响。终于，伊个阿哥阿嫂到国外去了，伊个爷娘也去了，石库门二楼房间委托亲眷照应，后首来就断了音讯。
伊是个爱情个失败者，也是生活个平庸者，却幸运个踏准了时代个节拍。由于住石库门亭子间留下来个心理阴影深刻，伊对房子有刻骨铭心个执念。商品房买卖放开之后，只要有得空，伊就到新建个楼盘去看房子，加上单位并到宝钢集团之后，腰包慢慢叫鼓起来了，竟然一口气买房、调房，勿断个倒腾，最终，勒市中心拥有了两套三室两厅个大房子，还勒郊区顺手买了两套小房子。石库门亭子间老里八早就搬出来了，出租拨勒外地人，每个号头月吃穿勿愁，日脚过得庸常而满足。
伊也经常会得想到：假使当年有套小房子，假使伊真个结婚了，假使伊真个也出国了……迭次回国，伊是专门来拿动迁款个。其实，伊曾回来过个，也曾经到石库门老房子看看，开门个却是外地人，亲眷也拿房子出租了，坐享租金却呒没拨过伊一分洋钿。更加让人生气个是，亲眷拿自家个名字写进了户口簿，迭次动迁费就侪归户主所有。伊据理力争，经办人员冷冷个问：房子本来就是国家租赁房，侬老早就加入外国籍了，有啥个资格拿动迁费？
确实，伊长勒中国人个面孔，却勿是中国人了，呒没18位个中国身份证号码。侬勒国外发大财了，还想揩中国个油，啥地方有迭种好事体？伊平心静气个接受了现实。迭次来石库门想作最后个告别，鬼使神差竟然走到了伊个老屋前头，更加呒没想到竟然能够勒此地碰到伊。
看来，一切早已命中注定。伊却勿相信命运，兴致勃勃个带牢伊到新天地、田子坊，勒武康路、愚园路漫步，兜兜转转、寻寻觅觅老早个光阴，却是一厢情愿、刻舟求剑。当年长发及腰，少年娶我可好？如今步履蹒跚、白发刺眼，坐勒咖啡卡座还想鸳梦重温，只好徒然怅惘。现在，手机微信功能强大，即使是远勒天涯海角，信息瞬间连接。
伊固执个想要加伊个微信，迟疑之间，伊从名牌坤包里拿出手机，跳出微信头像：一排石库门，微信名字叫：人生无常……。
（本文完）
